Книгата „Дарување смрт“ се вбројува во доцниот опус на Жак Дерида (комплетното издание е објавено во 1999 година), но нуди јасен увид во суштината на деконструкцијата и во методолошкиот апарат на веројатно највлијателниот филозоф од втората половина на XX век.
Дерида расправа за проблемот на одговорноста, тргнувајќи од анализа на библиската приказна за жртвувањето на Исак. Прашањето на одговорноста се разгледува во етички, политички, психолошки, религиски и естетски контекст, и се доведува во врска со концепциите на Кјеркегор, Хајдегер, Паточка и Левинас.
Во вториот дел, користејќи ја истата приказна за Авраам и Исак, Дерида се обидува да даде одговор на прашањето „Што е литературата и каква е нејзината природа?“, анализирајќи го притоа делото на Франц Кафка и Херман Мелвил.
„Дарување смрт“ ја демонстрира широчината и сеопфатноста на аналитичкиот пристап на Жак Дерида. Тука религиските прашања се поврзани со проблемите на филозофијата на историјата, со книжевна теорија и со политички размисли за прашањето на одговорноста во современиот европски контекст. Особено импресивна е анализата на тројниот однос помеѓу Бог, Авраам и Исак во моментот кога, според библиската приказна, таткото треба да го жртвува својот син. Со своето читање на библискиот текст, Дерида практично покажува како, всушност, функционира методот на деконструкцијата и во што се состои неговата суштина.
ДЕТАЛИ ЗА КНИГАТА
Едиција: Седмата функција на јазикот
Наслов на оригиналот: Donner la mort / Jacques Derrida
Преведувач: Елисавета Поповска
Број на страници: 200
Повез: мек
Формат: 15×23 cm
Година: 2018
ISBN: 978-608-4852-07-0